Ant 2014 ak 2022, mwen te pase nan moman difisil ki te mennen m pi pre Senyè a. Malgre difikilte ak doulè yo, sèt a uit ane sa yo te younn nan sezon ki pi beni nan lavi m. Senyè a tap travay dousman pou louvri je m sou plan Li pou limanite. Li louvri konpreyansyon m sou wayòm Li sou tè a ak gwo privilèj ki genyen nan wòl Li rele nou pou nou jwe nan pwoklame Pawòl Li. Pandan tan sa a, Bondye te pèmèt mwen li Bib la tout antye de Jenez a Revelasyon ki vle di depi kòmansman Bib la jouska nan fin. Li beni m 'ak yon swaf ki toujou ap grandi pou Pawòl li. Bondye te pèmèt mwen tou fè eksperyans pouvwa espirityèl ki gen nan jèn lè li te rele m pou m fè 40 jou jèn. An 2016, Sentespri Bondye te gide m pou m kreye Magnify the Lord Ministry, yon platfòm pou ankouraje koute Pawòl Bondye an kreyòl.
Menm jan ak sèl lepre ki te retounen di Jezi mèsi paske Li te geri l, (Luke 17:11-19) menm jan ak fanm samaritenn bò pi a ki te pataje eksperyans li de Jezi ak lòt moun nan vilaj li a, ( John 4: 4-30), menm jan ak apot yo ki pa t ka sispann pale sou sa yo te wè ak tande, (Travay 4:20) te gen yon dife ki t ap boule anndan mwen. Mwen pa t kapab rete an silans konsènan rankont mwen ak Senyè a. Younn nan fason pou demontre rekonesans nou anvè Bondye se onore moun ki pataje Pawòl la avèk nou. Kidonk, mwen ale kote tout bagay te kòmanse: Eglise Baptiste du Tabernacle (Legliz Batis Tabènak, PAP). Mwen te kòmanse kontakte ansyen manm asosyasyon jenès Legliz la pou onore ansyen Pastè nou an. Bib la di nan Ebre 13:7a, « Sonje dirijan nou yo, sa yo ki te preche nou Pawòl Bondye a. »
An avril 2021, nou kreye TYRE (Tabernacle Youth Reconnect), ki te regwoupe prèske 50 moun, sitou ansyen manm asosyasyon jèn legliz nan peyi nou an, Ayiti. Direksyon ak ansèyman ansyen Pastè nou an te gen anpil valè. Nou fè yon seremoni omaj nan dat 3 jiyè 2021, kote anviwon 300 moun ki soti nan diferan pati nan monn lan te rasanble an pèsòn e vityèlman pou eksprime apresyasyon yo. Nou te byen vit reyalize enpòtans pou rete konekte epi sipòte nou youn lòt. Kounye ya objektif prensipal nou se sèvi kòm yon sistèm sipò solid pou manm aktyèl yo epi ede yo grandi espirityèlman. Nou pran angajman tou pou dekouvri talan epi ankouraje/rann mounn kapab pou sèvi ak talan yo pou glorifye Bondye. A travè efò kolektif nou yo, nou kwè Bondye ap sèvi ak nou pou fè yon diferans. Pandan n ap travay pou atenn objektif nou yo ak ranfòse lyen nou anba direksyon Sentespri Bondye nan lavi nou, nou dekouvri plis pwisans ak potansyèl Bondye bannou chak jou pou akonpli misyon Li nan kominote nou yo lokalmen ak pi lwen.
Tarah Merceda Roch
Magnify The Lord Ministry
Lespri9.org
Lespri9 - Chemen pou yon nouvo mantalite
- Dispoze pou aprann
- Kite Laverite gide ou
- Dispoze pou filtre ansyen ak nouvo pèspektiv ou genyen nan limyè Ekriti
Misyon Nou
- Blayi enfliyans wayom Bondye nan tout sektè atravè tout sa n ap fè, tout sa n ap di, kit ann Ayiti kit nan lòt peyi.
- Ankouraje Ayisyen konekte ak Kreyatè yo epi dekouvri objektif yo sou Latè.
Pilye (Poto) nou se:
- Bib la - Pawòl Bondye a se gouvènans nou ak otorite siprèm nou.
- Jezi, Pawòl vivan an se Wa nou ak Senyè nou.
- Yon kè ki pran plezi nan Jezi Kri, Bondye nou.
Prensip Nou
Entegrite- Objektif- Pasyon- Angajman- Pèseverans
Ki sa sit la ofri?
- Yon anrejistreman odyo Bib la an kreyòl Ayisyen, pwodiksyon ekip nou an, ki disponib sou sit entènèt nou an ak sou aplikasyon an.
- Chan ak videyo adorasyon an fransè ak kreyòl sou direksyon mizisyen kretyen Ayisyen ki gen anpil talan, mayestro EC akonpaye ak chantè.
- Ayiti, An nou magnifye Senyè a.
- Epi tou, ou ka gade fim Jezi.
Nou envite w pou w koute Pawòl Bondye a regilyèman lè w retounen sou sit entènèt la oswa telechaje aplikasyon nou an. Ou ka jwenn aksè lyen aplikasyon Bib la ki disponib sou Google App Store ak PWA (Progressive Web App) oswa itilize lyen ki sou sit entènèt la. Ou kapab tou koute E&C Online Choir sou paj 'Lwanj' nou an, epi gade fim Jezi sou sitwèb nou an.
Nou envite w tcheke paj "Osijè Nou" pou aprann plis sou nou.
Ki jan ou ka ede?
- PRIYE pou nou e avèk nou pou yo konnen Kris e pou non Kris glorifye nan lavi yo.
- ANKOURAJE lòt moun vizite sit entènèt sa a. Pataje l e fè moun n konnen l!
- DON - Ou ka sipòte ministè nou an tou lè w klike sou siy don an. Nou se yon òganizasyon 501c, sètadi ki pa la pou fè pwofi monetè.
Se pou Sentespri Bondye ba w pouvwa pou w akonpli gwo bagay selon volonte l ak objektif li pou ou!🙏🏾
